Vigo, 24 de Maio. -
O rexedor afirmou que a proba de Beade é "unha carreira de dureza especial" afastada do concepto doutros 10.000 multitudinarios que se celebran no centro da cidade.
"Non sei por que facedes carreiras tan duras e complicadas, para romperlle as pernas aos atletas", chanceou Caballero, que non dubidou en definila como "unha gran proba que forma parte do circuíto Run Run Vigo e xa que logo desta elite de carreiras singulares", explicou.
Este 10.000 complétase en dúas voltas a un circuíto de 5 quilómetros que vira en torno á rúa Ramiro Pascual e ás estradas Coutada, da Venda e do Porto. É un auténtico 'rompepernas' polos seus tobogáns (subidas e baixadas), que converteron a carreira na máis dura e técnica das desta distancia que compoñen o circuíto municipal de carreiras populares, no que foi incluída por terceiro ano consecutivo.
O alcalde da cidade, Abel Caballero, acompañado polo concelleiro de Deportes, Manel Fernández, presentou o cartel do evento xunto con Fina Barreiro, presidenta da Asociación de Veciños, e Jesús Bouzada, director do centro cultural, encabezando ao grupo de organizadores.
"Estamos moi orgullosos desta proba e do traballo que fan dende o centro cultural", subliñou o alcalde, mentres que Fina Barreiro agradeceu "a aposta municipal para que esta carreira sexa parte do circuíto" e pediu a máxima difusión a un dos grandes eventos deportivos que vive a parroquia de Beade este ano.
A organización anunciou que espera acadar os cinco centos de inscritos entre a carreira absoluta e as dúas programadas para nenos e nenas, que comezarán unha hora despois do pistoletazo de saída da sénior. Nos 10 quilómetros hai xa 255 inscritos.
Os atletas cualifican de "dura e técnica pero moi bonita" esta cita en Beade tan selectiva, por iso é polo que a súa participación rolde habitualmente os 400 atletas.
A organización previu tamén unha carreira para nenos e nenas nacidos de 1999 a 2008, cunha distancia de 4.200 metros, e outra benxamín (nacidos en 2009 e seguintes) de 1.000 metros. Entre as dúas carreiras de promoción hai 65 inscritos.
Polo de agora dous foron os eventos pertencentes ao circuíto xa celebrados: a Vig-Bay (media maratón entre Vigo e Baiona) e a Happy Go Running (campus da Universidade), con preto de 4.400 participantes chegados a meta entre as dúas carreiras.
