Vigo, 26 de Xaneiro. - O alcalde de Vigo, Abel Caballero, presentou este venres a Liga Concello de Vigo de natación escolar, unha das accións complementarias ao programa municipal de escolas deportivas xunto co Trofeo Concello de Vigo de fútbol 8 (os sábados en Samil) e a Liga Linco de baloncesto (en Navia e en Balaídos), que comezará en poucas semanas. Para o xefe do goberno municipal é “un proxecto deportivo importante, fantástico e vital”.
Acompañado polo concelleiro de Deportes, Manel Fernández, polo presidente do Club Natación Vigo Rías Baixas, Enrique Pérez Cruces, e un dos membros do cadro técnico do club, Nina Rodríguez, Caballero celebrou o décimo aniversario da liga, “para centros educativos de Primaria”, lembrou o rexedor. Nesta oitava edición a piscina do Carme acollerá tres xornadas (este domingo día 28 ás 9:00 horas, o 17 de marzo e o 26 de maio). Co patrocinio municipal, o CN Vigo Rías Baixas está encargado da organización técnica, co apoio da Fundación VIDE e de Frutas Nieves.
Para esta primeira xornada pechouse a inscrición en 404 nadadores de trinta e dous centros de ensino, entre a categoría promesa (141 participantes, nacidos dende 2016 a 2018) e a benxamín (263, das xeracións do 2012 ao 2015), coa previsión de que ao remate do campionato se acaden os 600 participantes. Caballero incidiu en que a Liga “é unha experiencia marabillosa pois nenas e nenos aprenden a nadar e a competir nesta actividade”.
A Liga Concello de Vigo mantén o formato habitual: en xaneiro e marzo, 25 metros libre e 25 costas, en competición mixta, e na derradeira xornada, de entrega de medallas, tódolos participantes nadarán 25 metros libre. Na derradeira edición, no 2023, o Colexio Apóstol Santiago venceu na clasificación por puntos, mentres que a Escola Rosalía de Castro levantou o trofeo de colexio máis participativo. Os nadadores e nadadoras de Xesuítas levan seis edicións consecutivas de vitoria en vitoria.
O alcalde cifrou nuns 1.500 nenas e nenos os que compiten nestes eventos proxectados polo Concello para a base (fútbol, natación e baloncesto), con fin de reforzar o traballo dos clubs e entidades nas escolas deportivas.
