Vigo, 28 de Setembro. - O alcalde de Vigo, Abel Caballero, acompañado polo edil de Deportes, Manel Fernández, o presidente do Club Atletismo Veteranos de Samil, Modesto Comesaña, e por patrocinadores privados e atletas, presentou a primeira edición da Popular Praia de Samil-Memorial Alfonso Varela, que se vai correr este domingo polo areal urbano vigués (10:30 horas).
O rexedor felicitouse porque este evento "aproveita o que representa a efectos do deporte en xeral e do atletismo en particular a praia de Samil, un lugar onde cada vez máis competicións e de máis relevancia teñen lugar", explicou.
Coa baixamar, a saída darase na praia xusto fronte ao complexo deportivo municipal de Samil, e será un percorrido de 8 km. que chega ata a praia da Fonte e que pasará polo túnel que hai na mesma para acceder ao piñeiral e regresar á area para volver ao complexo deportivo municipal de Samil. "Combinaremos a area mollada con outra parte seca e un minicross", resumiu Comesaña.
De feito, esta "é unha carreira totalmente diferente e que non había en Vigo", anunciou o directivo, que lembrou que Samil é "a base de operacións do club" (alí naceu en 1998), e que a proba "é única por ser a mellor praia do mundo".
Son 250 inscritos cun 23,6% de participación feminina. Hai oito categorías masculinas e o mesmo número de femininas. Haberá tamén premio ao atleta máis veterano en categoría masculina e na feminina.
