Vigo, 23 de Decembro. - O pleno municipal aprobou este pasado mércores día 23 de xeito definitivo o orzamento do Concello para o vindeiro ano que ascende a 264 millóns de euros, co voto en contra dos grupos da oposición.
Abel Caballero valorou como “paso histórico” a validación pola Corporación Municipal do Orzamento Municipal para 2021 ao ser o décimo quinto aprobado de forma definitiva e o “máis alto da historia de Vigo”.
En rolda de prensa posterior, o rexedor detallou que os Orzamentos municipais para 2021 teñen menor presión fiscal, recollen unha baixada dos impostos, con débeda cero, con 20 millóns de dedicación á Política Social, unha área que non terá límite de gasto, de xeito que se engadirá aquilo que sexa necesario. Lembrou o alcalde que, desde que recibiu o bastón de mando aumentou un 326% a dedicación social do orzamento e un 140% a partida de emprego.
O documento contempla investimentos por valor de 26 millóns de euros aos que cómpre sumar os 36 millóns de remanentes aprobados recentemente e que, para Caballero, “xeran emprego”. Destacou tamén a importancia das bonificacións aplicadas polo Concello a 12.000 actividades comerciais no ano 2020, 5 millóns de euros para aplicar a taxa cero en terrazas, auga e vados non cobrados, polo que son “milleiros de familias” as que ven rebaixados os seus impostos así como o sector hostaleiro que suma “millóns de euros” de bonificacións.
Os orzamentos garanten o que nos últimos meses avanzou o rexedor en reunións telemáticas co concelleiro de Deportes, Manel Fernández, e unha ampla representación do tecido asociativo do deporte de Vigo: os clubs manterán as axudas do ano anterior aínda que a súa actividade baixara polo confinamento e a cancelación de probas.
Deste xeito, as grandes liñas de apoio sumarán 2,8 millóns de euros para entidades, deportistas, eventos e infraestruturas, dos que 1,46 millóns son axudas directas a clubs de base (925.000 euros), elite (446.500 €) e o resta chega a través da propia Concellería (programa de equipacións), da Fundación VIDE e dunha axuda especial da Concellería de Igualdade ao deporte feminino.
Eventos (319.000 euros), programa municipal de escolas deportivas (373.149), deporte individual (70.000) e infraestruturas deportivas (623.500) son algúns dos grandes números para evitar que a pandemia afecte ao deporte do municipio.
